L’ souèton e sé mission

Artiq astourë l' 18 du mouâz d'avri 2024

Lé mission d Chubri

L’institu Chubri vieû aidë a rdon·në l’galo é pu jiënn e é horvenu. Pourr sa, son but, s’ée d fèrr dé-z outi linghistiq fondmentao pourr qe l’mondd pev etudië e s sèrvi du galo ô jour d’anët.

Dedpée 2007, Chubri aji surtout den le dmënn de la linghistiq du galo pourr aïdë a l’·rdon·në :

• La rassèrri linghistiq pèrmèt d crèyë dé rsourç doqhumentérr d’interées linghistiq, surtout en fzaun d-z enqhétt oral, e pée en rag·rouaun dé doqhument ecrit.
• L’depoulhment e lé bani d don·née, s’ée fèrr de la lecçicografi, dé rnott de tecç, de la rchèrch de tèrm nouviao (pourr lé nouviao bëzein espeçializë ou d la vi d tout lé jour) e dé banî en lign (de bâzz de don·née e d doqhument limeriq).
• L’etudd linghistiq e l’egâlhment dé cnéssaunç, sa q’a conm but d decrirr le parlement, d ·rchèrchë dé soluçion d’ecriturr qhi son ajustée é maniërr de caozë, de fèrr acnétt lé nouvèl savaunç forjée  parr dé-z artiq e dé dôssiéer en lign ou parr dé formézon su la linghistiq du galo, e pée d ·rdon·në lé frut d-z enqhétt linghistiq den lé contrée eyou q’il on të fètt.
• Le sèrviç de t·rlatri vieû repondd, den lé regl du métiër, é bzein dé souèton, dé colèctivitë d tèrouër e d-z ent·rprinzz, en s’apouyan su lé savançtë qe Chubri a forjée den toutt sé fzaunç linghistiq.

En pu d sa, l’institut linghistiq mèt su pië dé fzaunç de devlopment pourr fèrr cnétt sé fzurr e pourr sensibilizë l’mondd su l’galo, lé drët qhulturao e langaïjiéer, e pée su l-z enjeû d la ravigotri du parlement : d la ghimentri, dé contribuçion pourr dé banî, dé préchée, dé propôzée d politiq publliq, ou bin la prinzz part é rézô souèton·niéer…

In souèton d’aprée la louae 1901

Chubri ée in souèton slon la louae d 1901. Il a të decllarë ô Jorna ofiçia l’ 23 d septenb 2000. En juin 2007, l’sujit du souèton fu chaunjë pourr se raportë a son nouviao projit. L’sujit-la ée detâlhë den l’artiq 2 dé statut (qhi’on të astourë en 2015) :

« L’sujit du souèton, s’ée d fèrr l’inventérr du galo, de ll etudië, d l'astourë e d’egâlhë lé cnéssaunç q’i crèy.

I contt prendd part a :

• protaijë l’eritaïj du galo, l’·rdon·në é nouvèl jenerâçion e é horvenu, den l’Pèyi Galéez e âlhou ;
• a respèctë lé drët qhulturao den le dmënn du parlement, e sa conpren : l’drët d châq de parlë galo (en privë conm en publliq), le drët d parlë den son dialèct galéez a sae (en dizaun conm en·n ecrivaun), ou bin corr le drët d’ap·rchë l’galo pourr châq pèrson·n qhi dmërr den l’Pèyi Galéez.

Il a conm but :

• d fèrr l’inventérr du galo ôprè dé caozz-galo d néssaunç e egâlhë lé don·née e lé cnéssaunç q’i crèy ;
• de propôzë d-z outi e dé sèrviç pourr aïdë a s sèrvi du galo astourr, en respèctaun l’drët d châq pèrson·n de parlë den son dialèct a sae ;
• d’aïdë a fèrr sourçë ënn ençèrch linghistiq, charpentée e d métiër, su l’galéez, e a mètt en rézô dé conpetenç den le dmënn-la. »

Yétt menbr

Chubri ragrou dé menbr en titr e dé menbr soutnaunt ou soutnauntt ; il on tout l’drët d votë en graundd assenbllée.

• Lé menbr en titr son d’abord ag·rië parr le consèlh dirijaunt pourr le devni. En graundd assenbllée, i pev yétt elu ô consèlh dirijaunt.
• N’inportt qhi peû devni membr soutnaunt°t en pèyaun ënn cotizz ô souèton.
• Pourr païssë en lign den HelloAsso, cliquée don ici.
• Pourr fèrr sa parr couriër, clliqée don içi.

Consalh dirijaunt

Châq an·née, la grandd assenbllée deçidd le dirijment d-z acçion e d la march du souèton. Èl eli in consalh dirijaunt qhi’ée encharjë dé deçidd courantt. En-dden l’ consalh, le buraod aparr e lé deçidd du consalh e i s'asurr q'i son minzz su pië, en travâlhaun d prée do le mnou.

L’ consalh dirijaunt qhi’a të elu en juin 2022 :

• Lé menbr du buraod : Lydie Porée (p·rzidentt), Rémy Bamba (segretérr), Catherine Drider (t·rzoriërr).
• L-z aotr consèlhéer : "Colâ" Nicolas Auffray (viç-segretérr), Lydie Micault, Raphaël Thébault. 

L-z apouyâ publliq de Chubri

Chubri fu soutinz en 2022 parr l'etat e lé colèctivitë-çi :

• Ministèrr de la Qhulturr 
• Consèlh rejion·na d B·rtingn
• Consèlh rejion·na dé Pèyi d la Louèrr
• Consèlh departementa dé Côtt d'Ahaot
• Consèlh departementa d’Il e Vilënn
• Consèlh departementa d Louérr Atlantiq
• Consèlh departementa du Morbiyan
• Vil de Rënn

Cae q sa vieû dirr, Chubri ?

Du "chubri", s’ée du "rôz", la pllantt qhi s trouv su l’ bord dé-z etaun e qhèq fae den lé mârr. L’ mot-la s di den la contrée d ·Rtiér e d Janzë (35). Senb·l q’il ée pouint ghèrr evâlhë, pouint aotaunt conm "rôz" qhi’ée pu couraunt. L’mot-la sèrvi en 1982 pourr nonmë in projit d’afilonjée d livr de livr du Laboratouèrr d’Etudd e d’Ençèrch Galéezz. Malgrë q’i’u rin q’in limerot d bani, l’livr-la a marqë du mondd a caozz qe sa të la p·rmierr fae q n’avë dé contribuée d'universitérr qhi tein ag·rouée d minm den le dmënn du parlement galéez. Parr le titr-la, l’souèton a vlu saluë l’ouvraïj fètt parr le mondd qhi contribu a devlopë la savaunç su l’galo.

Sietâ soçia, codd SIRET e NAF

Sietâ soçia > 23 rabinn de Ghuyënn, 35000 Rënn

SIRET > 478 382 930 00053

NAF > 9499Z

Courr web

Grafiss : Stéphanie Triballier / Le Jardin Graphique

Devlopment web : Yves Robin / Le Jardin Graphique